किराँत समुदायको महान् पर्व उभौलीको सुखद् अवसरमा राई, लिम्बू, सुनुवार, याक्खा लगायत सम्पूर्ण किराँत दिदीबहिनी तथा दाजुभाइहरूमा सुख, शान्ति र समृद्धिका लागि हार्दिक शुभकामना व्यक्त गर्दछु ।

जाडो सकिएर गर्मी मौसम सुरु भएसँगै मानिस, जीवजन्तु तथा पशुपंक्षीहरू उँधोबाट उँभोतिर बसाइँ सर्ने समयमा वैशाख शुक्ल पूर्णिमाको दिन किरात समुदायद्वारा मनाइने उभौली पर्वको अवसरमा लगाइएको अन्नबाली सप्रियोस्, खडेरी, बाढी र पहिरो जस्ता प्राकृतिक विपत्तिहरू नआउन् भनी प्रकृति र पितृको पूजा गर्ने विशिष्ट परम्परा रहेको छ ।

प्राकृतिक ऋतुचक्रसँग एकाकार भएर जीवन निर्वाह गर्न अभ्यस्त किराँत समुदायको यस सांस्कृतिक पर्वले मानव र प्रकृति बीचको अन्योन्याश्रित सम्बन्धलाई उजागर गर्दछ । उभौली जस्ता पर्वहरूका माध्यमबाट विविधतायुक्त नेपाली समाजमा आपसी सद्‌भाव र सहिष्णुताको भावना अभिवृद्धि भई राष्ट्रिय एकता सुदृढ गर्न टेवा पुग्नेछ । समाजमा विद्यमान एकता र सामुदायिक मेलमिलापलाई अझ कसिलो बनाउन यस अवसरमा म सबैलाई आव्हान गर्दछु ।

यस वर्षको उभौली पर्वले हामी बीचको सामाजिक-सांस्कृतिक ऐक्यबद्धतालाई थप सुदृढ गर्दै समतामूलक‚ सभ्य र सुसंस्कृत समाज निर्माणका लागि हामी सबैलाई प्रेरणा प्रदान गरोस् भन्‍ने शुभकामना व्यक्त गर्दछु ।

धन्यवाद ।